BUTUAN CITY – Nabalik na sa Butuan City Jail ang puganteng si Romulo Cadampog human kini misurender ngadto sa Bukidnon Police Provincial Office ning mi-aging adlaw.
Sa pagkakaron, dili pa madetermina ang mahimong sangputan niini tungod kay hulaton pa nga matapos ang gilusad nga imbestigasyon kalabot sa iyang pagsibat.
Una nang gibutyag ni Butuan City Jail spokesperson JO1 Regine Villarias sa eksklusibong pakighinabi ning sibyahan nga i-verify pa kung kinsa nga indibidwal o kaha grupo angayang ihatag ang sien-mil pesos nga reward money nga gipatong sa maong jail facility batuk sa maong eskapo.
Kini tungod kay tumbukon pa kung kinsa ang duna’y dakong papel nga misangpot sa pagsurender ni Cadampog kondiin apil sa suaton ang kontribusyon sa pamilya niini sa Bukidnon sa iyang pagsurender, kapulisan, apil na ang mga hingtungdang jail personnel.
Kini tungod kay ila man gayong ihatag ang reward money nga gi-amut amutan nila mismong mga personahe alang sa daling pagkasikop sa pugante.
