BUTUAN CITY – Patay nang na-abtan sa kapulisan sa Butuan City Police Station 1 ang usa ka inahan human gitu-uhang gitu-ok sa iyang anak nga ulitawo kinsa naghikog-patay usab kagabii sa Purok 13, Brgy. San Vicente ning siyudad sa Butuan.
Napalgan sulod sa kwarto sa pinuy-anan sa mga biktima ang wala na’y kinabuhing si Marlon Argawanun, 40-anyos, ulitawo ug factory worker sa Cebu City human kini naghikog luyo mismo sa pultahan sa kwarto gamit ang tie wire samtang sa pila ka tikang lang, wala na usa’y kinabuhi ang iyang inahang si Teresita Argawanon, 76-anyos, kinsa gigapos ang mga kamot ug tiil gamit ang tie wire ug gitu-uhang gitu-ok ug gitabuna’g t-shirt ang nawong rason nga posibleng na-suffocate.
Nasayrang pasado alas-11 kagabii dihang nakadawat og tawag sa telepono ang Butuan City Police Station 1 nga nagpahibalong gitigbas sa sukspek ang iyang 26-anyos nga pag-umangkong si Arthur Agbong, residente sa susamang dapit kinsa na-igo sa ulo ug duha ka mga kamot apan nakadagan ug nakapangayo pa og tabang rason nga narespon dihan gilayon ang kremin.
