BUTUAN CITY – Anaa na sa kostudiya sa Regional Intelligence Division-13 alang sa tukmang disposasyon ang nadakpang Top 4 Most Wanted member sa communist terrorist group kon CTG nga si Atheliana Hijos alias Ka Atel, ang Secretary General sa Gabriela-Caraga.
Gikumpirma kini ni PMajor Jennifer Ometer, tigpamaba sa Police Regional Office kon PRO-13 human nadakpan ang suspek niadtong alas-sais sa mi-aging Martes sa gabii Agusto 30 didto sa District 8, Barangay Kinabjangan, Nasipit, Agusan del Norte.
Sa eksklusibong pakighinabi sa Bombo Radyo Butuan, gibutyag ni Major Ometer nga ang pagkasikop kang Hijos base na sa Warrant of Arrest sa kasong murder nga gi-isyu sa Regional Trial Court (RTC) Branch 34 sa Cabadbaran City, Agusan del Norte niadtong June 10, 2020 ingon man kidnapping ug serious illegal detention nga giisyu sa RTC Branch 7, Bayugan City, Agusan del Sur niadtong Pebrero 12, 2020, kondiin wala’y pyansang girekomenda.
Base matud pa sa imbstigasyon, nalambigit si Ka Atel sa armadong pakigbisog batuk sa mga membro sa Armed Forces of Philippines sa Purok 2, Sitio Kalipayan, Barangay Cuyago Agusan del Norte niadtong Nobyembre 20, 2019 nga mipatay kang Corporal Mario Suson ingon man pagdagit sa usa ka Civilian Active Auxiliary (CAA), ug pagdetine niini sa wala matumbok nga loakasyon niadtong Disyembre 29, 2018, nga nahitabo sa Barangay Kolambungan, Sibagat, Agusan del Sur.
