BUTUAN CITY – Excited na ang kadaghanang mga Pinoy didto sa Singapore sa pagbisita ni Pangulong Bongbong Marcos Jr., karong Setyembre 6 ug 7.
Sumala ni Bombo International Correspondent Rico Ruiz Frias direkta gikan sa Singapore, sa ekslusibong pakighinabi sa Bombo Radyo Butuan, gibutyag niining andam na sila ilabina ang supporters ni Pangulong Marcos Jr., sa iyang pagbisita ingon man si Singaporean President Halimah Yacob kinsa maoy nag-imbitar sa pangulo sa maong state visit.
Sumala ni Frias, usa sa mga rason sa pagbisita sa pangulo sa Singapore ang pagdasig sa mga stakeholders nga mu-invest sa Pilipinas ug pakusgan usab ang relasyon niini sa matag-usa ilabi na nga daghang mga Filipino professionals ug non-professional ang nagtrabaho sa maong nasud nga gibana-banang mu-abot sa kapin 200,000.
Sa pagkakaron, wala pa’y tima-ilhan sa pagpangandam ang maong nasud alang sa pagbisita ni Pangulong BBM.
