BUTUAN CITY – All set na ang security plan sa Butuan City Police Office alang sa tanang tunghaan ning siyudad subay sa pagbukas na sa school year 2022-2023 karong Lunes, Agusto 22.
Sa eksklusibong pakighinabi sa Bombo Radyo Butuan kang PMajor Riza Toroto, tigpamaba sa Butuan City Police Office, gibutyag niining niadto pa lang sa hinapos nga bahin sa buwan sa Hulyo, kasado na ang ilang security plan gani, nakig-alayon na sila sa mga school administrators aron ilang makuha ang paagi nga maka-assess sila alang sa siguridad sa tanan ilabina sa mga magtutungha ug mga magtutudlo.
Gisiguro nilang mahimong hapsay ug malinawon ang unang adlaw sa klase hangtud na sa regular nga inadlaw nga tingklase ilabina nga duha ka tuig nga gihunong ang face-to-face classes tungod sa COVID-19 pandemic.
Hugot matud pa ang ilang pagsiguro nga wala’y mga lawless elements nga makalawgaw sa panahon sa tingtungha pinaagi sa pagpakusog sa police visibility.
Duna usab sila’y imontar nga help desk sa mga tunghaang duna’y daghang nga estudyante aron duna’y madu-ulan ang mga stakeholders ilabina ang mga estudyante panahon sa emerhensiya.
