BUTUAN CITY – Padayon karun ang imbestigasyon sa kapulisan aron masuta ang motibo og mailhan ang mga suspetsado sa pagpamusil kaganinang alas 11:35 sa buntag sa may P-4, Brgy. Fort Poyohon Butuan nga miresulta sa kamatayon sa usa ka pedicab driver.
Naila ang biktima nga si Dante Garcia, olitawo nga residente sa P-1 Brgy. Holy Redeemer, Butuan City.
Nasayrang nakadawat nalang og taho ang kapulisan gikan sa nagpakabanang indibidwal mahitungod sa pagpamusil nga dali usab nilang girespondihan. Pag-abot sa nahitaboan, nakita ang nagkadugo nga biktima nga daling gidala usab sa ngadto sa ospital apan gideklarang dead-on-arrival pasado alas 11:59 sa buntag ni Dr. Renato Muñez, ang attending physician.
Sa inisyal nga imbestigasyon, nasuta nga ang biktima samtang nagmaneho sa iyang padyak, kalit nga miabot ang mga suspetsado nga nagsakay sa kolor itom nga single motor og gipusil ang biktima sa maka-upat ka higayon.
Nakahiagum ang biktima og samad pinusilan sa likod nga bahin sa lawas samtang ang mga suspek daling misibat padulong sa Andaya road. Narekober sa lugar nga nahitaboan ang upat ka basyo sa bala sa wala pa madeterminang klase sa armas.
