BUTUAN CITY – Daghang anggulo ang gilantaw karun sa kapulisan sa Bayugan City may kalabutan sa pagpusil-patay sa kapitan sa Barangay Mabuhay sakop sa maong siyudad kaganinang alas 11:45 sa buntag.
Sa pakighinabi ning sibyahan kang Police Lt. Col. Michael John Mangahis, hepe sa Bayugan City Police Station nga lawom nga imbestigasyon ang ilang gihimo aron mailhan ang mga suspetsado sa pagpusil sa biktimang si Kapitan Librado Juventod.
Sa inisyal nga imbestigasyon, gihulatan lang sa duha ka suspetsado si Kapitan Juventod nga mogawas sa barangay hall. Nakasakay na siya sa iyang motor sa dihang gipusil siya sa makadaghan higayon.
Muabot matud pa sa 7 ka mga igo sa bala ang na-angkon sa biktima diha sa iyang likod nga maoy hinungdan sa iyang hinanaling kamatayon. Gibutyag sa hepe nga dunay bug-at nga motibo sa pagpatay sa kapitan base sa daghang mga samad nga iyang na-angkon.
Gilantaw matud pa nila karun ang tanang anggulo sama sa pulitika, og personal nga motibo. Lakip usab sa gi-establisar karun sa kapulisan kung duna bay armas nga dala ang kapitan base sa migawas nga mga impormasyon.
