BUTUAN CITY – Padayon ang gihimong imbestigasyon sa Butuan City Police Station 4 sa natigayong pagpamusil pasado alas-7:30 kagabii sa P-6, Upper Sidlakan, Barangay Sto Niño ning siyudad sa Butuan aron ma-iilhan ang mga suspek ug masuta ang motibo sa kremin.
Naila ang biktimang si Jessie Lolo Apollo, 48-anyos, duna’y ka-ipon ug gwardiya sa lokal nga kagamhanan sa Remedios T. Romualdez kon RTR, Agusan del Norte.
Sigon sa inisyal nga imbestigasyon, migawas ang anak nga babaye sa biktima aron mupadulong sa ilang pansayan dihang kalit lang mitunga ang pipila ka armadong mga lalaki ug giti-unan siya og armas dayong sulod sa balay ug gimanduan ang biktima pagsulod sa kwarto, dili magsaba og gipapalong ang suga.
Dinhi na mitindog ang anak sa biktima ug misulod sa pikas kwarto ka-uban ang laing suspek ug dihang nakahigayon, misibat kini ug mikaratil og dagan dayong singgit ug tabang.
Sulod usab sa balay, gipakuha sa biktima ang armas nga gipangayo sa mga suspek kansa iyang gipanghimakak nga duna’y iya ug misulay paggawas sa kwarto aron unta musibat apan duna’y nag-atang resulta sa ilang pagkarambola hangtud nga gipusil na ang biktima sa makadaghang higayon.
Daling nanibat ang mga suspek samtang ang biktima gidala usab sa Butuan Medical Center apan gideklarang dead on arrival sa attending physician.
Atol sa crime scene processing, narekober ang 11 ka mga gitira na mga cartridges sa 9mm caliber nga bala, ingon man usa ka basiyo sa bala sa maong armas kansa gipa-ilalom na sa ballistic examination aron gamitong ebidensya sa maong hitabo.
