BUTUAN CITY – Maglusad og clearing operations karong adlawa ang National Grid Corporation of the Philippines kon NGCP-Caraga aron maputol na ang mga kahoy’ng Falcatta nga hapit nang mu-abot sa ilang mga transmission lines sa may kasadpang bahin sa ilang area of responsibility sa may Misamis Oriental.
Sa eksklusibong pakighinabi sa Bombo Radyo Butuan, gibutyag ni NGCP-Caraga spokesperson Chris Abellanosa nga ka-uban nila sa operasyon ang pipila ka mga personahe sa Commission on Elections kon COMELEC-Misamis Oriental, kapulisan ug kasundaluhan, taga-Department of Environment and Natural Resources kon DENR ug mga opisyal sa hingtungdang local government units.
Kini nga operasyon suportado sa COMELEC Resolution No. 10743 tungod sa dili mukooperar nga tag-iya sa luna aron putlon unta ang mga kahoy’ng Falcatta taliwa nga nakignegosyar na ang NGCP kanila.
Kinahanglan na matud pa kining operisyunan sa kagamhanan tungod kay bisan unsang orasa, mahimo nang musangko ang maong mga kahoy ngadto sa conductor sa ilang Jasaan-Butuan 138,000-volts transmission line.
Bisan og wala sa Caraga Region ang maong lugar apan higayong maka-abot na ang punuan sa kahoy sa maong conductor, magmugna kini og halapad nga blackout sa Caraga Region ingon man sa Mindanao grid sa kinatibuk-an.
Ang gikasubo pa sa NGCP tungod kay intensyunal ang pagtanom sa maong mga kahoy kansa dili nila kanunay nga ma-monitor tungod kay atua man kini sa bukid nga bahin rason nga pugsanon nila kining pamutlon karong adlawa ka-uban ang ma local officials sa lugar diin kini nahimutang.
Sa ilang mabagatan matud pa nga mga right of way issues, dali rang pasabton ang kadaghanan mga tag-iya sa yuta kondiin bayaran sila sa NGCP sa kantidad nga angay kanila base usab sa ilang taripa, apan lahi matud pa ang tag-iya sa maong mga kahoy nga ilang operisyunan karong adlawa.
Gidugang pa ni Abellanosa nga base sa pagsusi sa ilang mga personahe, mukabat sa 69 ka mga Falcatta trees ang gituyo pagtanom sa maong lugar taliwa nga nasayod na ang tag-iya niining dili pwedeng tamnan og mga kahoy ang ubos sa ilang mga transmission lines.
Hinuon sa pagkakaron, normal ang operasyon sa tanang mga NGCP facilities dinhi sa Caraga Region.
