BUTUAN CITY – Gikustudiya na sa Department of Environment and Natural resources kon DENR sa Barangay Ampayon ning siyudad sa Butuan ang nakumpiskang mga kahoy nga lauan human usab ang gipahigayon nga operasyon sa nakalabay nga adlaw diha sa may Purok 2, Brgy. Tinucuran, Las Nieves, Agusan del Norte.
Nasayran nga mihimo og anti-illegal logging campaign ang ginsakupan sa Las Nieves Municipal Police Station sa pakig-alayon sa Department of Environment and Natural Resources nga miresulta sa pagkakumpiska sa gi-abandonang mga kahoy nga Lauan nga gibana-banang mokantidad og 123-mil 360 ka pesos.
Base sa nakuhang impormasyon gikan sa POlice Regional Office kon PRO-13, muabot sa 196 ka tabla sa kahoy nga lauan nga miabot sa 4,112 board feet ang malampusong nakumpiska.
Base sa taho sa Las Nieves Municipal Police Station, ang nasangpit nga mga kahoy gipalusot agi sa Agusan river sa wala pa matumbok nga mga suspetsado.
Mapasalamaton nalang ang kapulisan sa padayong suporta sa kumunidad diha sa paghatag og impormasyon nga miresulta sa malampusong operasyon samtang nagpadayon ang imbestigasyon aron matumbok ang tag-iya sa gi-abandonang mga kahoy.
