BUTUAN CITY – Mi-abot sa 26 ka mga patay’ng lawas na ang narekober sa mga otoridad sa nagpadayong retrieval operation sa Brgy. Pilar, lungsod sa Abuyog Leyte diin natigayon ang lapad nga landslides.
Kini wala pa’y labot sa mga landslides sa Baybay City, kansa halos usa ka oras ang biyahe gikan sa Abuyog. Sa listahan sa Leyte Police Provincial Office, mi-abot na sa 78 ang ihap sa mga casualties sa probinsya sa Leyte tungod sa bagyong Agaton.
Sa maong ihap, 47 niini gikan sa Baybay City kansa duna pa’y unom nga missing ug 236 na ang angol samtang 31 na ang kinatibuk-ang ihap sa mga namatay sa Abuyog apil na ang narekober kagahapon.
Nagpadayon pa karon ang rescue operations sa maong mga lugar bisan og una nang gipadayag ni Baybay City Mayor Carlos Cari nga retrieval operation na lang ang gihimo sa ilang mga barangay nga apektado sa landslides kondiin ang tibuok Brgy. Kantagnos, nabanlas na tungod sa midahiling yuta ug mga lapok.
Sa pagkakaron, mi-abot sa 150 ka mga residente ang missing ug kapin sa 250 usab ang gihikling sa mga evacuation centers sa Abuyog apil na kadtong mga na-rescue gamit ang mga bangka.
