BUTUAN CITY – Padayon karun ang gihimong imbestigasyon sa kapulisan aron mailhan ang mga suspetsado nga mihimo sa paglungkab sa usa ka parmasya sa may P-3A, Barangay Ampayon, Butuan City kagahapong adlawa.
Nadiskubrihan nalang ang maong insidente pasado alas 8:40 sa buntag nga daling gipaabot usab ngadto sa kapulisan pinaagi ni Anecita Cabarubias Uy, legal ang pangedaron, menyu og tag-iya sa C&C Pharmacy,ug residente sa 169 El Salvador, Brgy. 18 Obrero, ning siyudad sa Butuan.
Sa inisyal nga pakisusi sa ginsakupan sa Butuan City Police Station kon BCPS-4, ang empleyado sa maong parmasya nga si Ernie Inte Catubig, ang nag-abli sa parmasya og nabantayang nagkagubot na ang mga tinda niini samtang dunay bangag sa alkuba rasong gipahibalo gelayon niya ang tag-iya.
Dinhe nasuta ang mga produktong nawala sama sa usa ka botelya sa mahalong ilimnon nga double black nga nagkantidad og 1,567 pesos, og usa ka botelya pa sa laing ilimnon nga mibalor sa 800 pesos. Nawala usab ang cash nga 5-mil pesos ug usa ka unit sa cellphone nga tag-500 pesos nga gipanag-iyahan ni Mie Aaron Campener Sanchez samtang mahalong cellphone usab nga tag 8-mil pesos ang nawala nga gipanag-iyahan ni Shionette Banawa Puron.
Nadiskubrihan usab ang ang CCTV camera sa maong establishemento wala na nag-andar.
