BUTUAN CITY – Gipanghimakak ni Atty. Ernie Palanan, election officer sa Dinagat Islands province ang nanggawas nga hungihong nga isibog una ang ilang eleksyon karong Mayo 9 tungod sa ka-apiki matud pa sa preparasyon human kini na-igo og maayo sa bagyong Odette.
Sa eksklusibong pakighinabi sa Bombo Radyo Butuan, gipadayag ni Atty. Palanan nga wala sa ilang plano ang postponement tungod kay mapangitaan matud pa og pamaagi ang tanan kung duna may mutumaw nga problema.
Kung hisgutan matud pa ang kahapsay ug kalinaw sa ilang lalawigan, wala sila’y nakitang problema tungod kay walay mga rebeldeng New People’s Army kon NPA didtong dapita.
Kung hisgutan usab ang crime rate, halos wala pa’y matigayong kremin kada-bulan nga iya pang gikatingala. Ang ila lang giproblema karon mao ang kadaghan sa mga eskwelahan nga naguba kansa maoy gamiton karong eleksyon rason nga padayon ang ilang pagpahimo og mga make-shift tents aron dili ma-ataw ataw ang mga botante.
Duna matud pa siya’y nadunggan nga mga istoryang duna’y armadong grupo sa pipila ka mga pulitiko sa maong lalawigan ilabina sa lungsod sa Tubajon rason nga iya pa kining gipa-verify sa kapulisan ug sa kasundaluhan apil na ang mga dayo lang sa isla.
Aminado ang opisyalnga hungihong lang kini apan wala pa’y gikumpirma kaniya ang mga otoridad apan sa gihapon, padayon ang iyang pag-asses ug pag-validate niini aron lang masiguro ang hapsay ug malinawong eleksyon.
