BUTUAN CITY – Gi-deactivate na sa Department of Social Welfare and Development kon DSWD-Caraga ang tanang mga Emergency Operations Centers kon EOCs nga gimugna human ang paghapak sa bagyong Odette niadtong Disyembre ning mi-aging tuig.
Kini ang gipahibalo ni DSWD-Caraga spokesperson Marko Davey Reyes human ang ilang Regional Disaster Response Committee kon RDRC Coordination Meeting alang sa ilang Typhoon Odette Response Operation kagahapon dinhi sa dakbayan sa Butuan.
Sa eksklusibong pakighinabi sa Bombo Radyo Butuan, gipadayag ni Reyes nga ang deactivation sa mga response clusters, base kini sa Memorandum no. 28 series of 2022 nga gipagawas sa National Disaster Risk Reduction and Management Council kon NDRRMC.
Tungod kini sa nagkagamay na nga ihap sa mga evacuees nga biktima sa gamhanang bagyo ingon man ang pagsira na kadaghanang mga evacuation centers ug nagka-ubos na nga mga requests sa mga hinabang gikan sa mga regional Disaster Risk Reduction and Management Councils kon DRRMCs.
Apan bisan pa man niini, giklaro ni Reyes nga magpadayon pa gihapon ang ilang mga relief operations ilabina nga duna pa’y mga munisipyo nga nanginahanglan pa og padayon nga suporta sa ingon mahatag pa ang batakang panginahanglanon sa katawhan.
Magpadayon usab ang pagsubmite sa ilang mga reports ilabina sa mga apektado pang Local DRRMOs aron masuta kung unsa pa ang angayang itunol nga mga ayuda.
