BUTUAN CITY – Wala’y bag-ong community quarantine status nga ipatuman dinhi sa dakbayan sa Butuan tungod kay bisan og matapos na ugmang adlawa, Oktubre 15 ang General Community Quarantine kon GCQ with heightened restrictions, ipatuman gihapon kini hangtud sa katapusang adlaw ning bulana.
Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus, wala gipa-ubos sa Regional Task Force Against COVID-19 ang maong status aron pabiling mag-amping ang tanang mga Butuan batuk sa makamatay nga coronavirus ilabina sa nagkada-iya niining variants of concern, taliwa nga pila ka adlaw nang mikunhod ang kaso.
Sigon ni de Jesus, wala usab magduso ang Incident Management Team og ingon niini nga lakang ilabina nga sayo pa aron mukumpyansa ilabina nga nagpabilin pa gihapon ang hulga sa mga variants of concern sa COVID-19 partikular sa mas makatakod nga Delta variant.
Samtang alang sa umalabot nga paghandom sa tanan sa adlaw sa mga kalag ug mga santos, gipadayag sa opisyal nga posibleng ipagawas na karong semanaha ang executive order alang niini.
Hulaton lang matud pa nila ang mahimong lakang nga ipatuman sa Inter-Agency Task Force for the Emerging of Infectious Diseases kon IATF alang niini sa ilang tigom karong adlawa.
Hinuon sa pagkakaron, mahimo matud pang makabisita sa nagkada-iyang sam-ang ang mga tawo aron makapanghinlo basta magsunod gihapon sa minimum health protocols basta wala pa’y gipagawas nga kamanduan alang sa pagsira sa mga sam-ang.
