BUTUAN CITY-
Nahatagan na og ayuda sa Butuan City Social Welfare and Development kon CSWD ang mga nanghikling nga 43 ka mga pamilya kon 145 ka mga indibidwal gikan sa Sitio Balite, Purok 13-A sakop sa Brgy Bit-os ning syudad tungod sa giyera tali sa mga sundalo ug sa mga rebeldeng New People’s Army.
Sumala ni Barangay Kapitan Elsa Mardino sa eksklusibong pakighinabi ning sibyahan, nagsugod niadtong Biernes sa alas-3:30 sa hapon ang giyera rason nga pagkagabii, gi-rescue gilayon sa mga barangay officials ang mga residente kodiin hangtud kagahapong adlawa, padayon pang madunggan ang binakbakay sa armas.
Gidugang pa ni Kapitan Mardino, muabot sa 4 ka kilometros gikan sa ilang covered court paingun sa katapusang barangay kansa mao usab ang boundary sa Barangay Nong-Nong ug Bit-os ang gihiklingan sa mga residente.
Gani dunay ubang residente ang mi-adto sa ilang kasilinganan nga layo sa nasangpit nga purok.
Apan pasalamat na lamang sa opisyal tungod kay walay nagmagahi nga mga residente sa paghikling dihang gilayon nga medisisyon ang uban nga mobiya una sa ilang nahimutangan.
Gani wala na panumbalinga sa uban ang social distancing tungod sa kahadlok apan padayon nga gisuot ang facemask ug pag-alcohol.
Sa kasamtangan, gidala na kagahapon sa San Roque Elementary School ang mga pamilyang apektado aron mahimong luwas sila panahon sa kagabhi-on.
Samtang gibutyag usab ni Myrna Bonggato kansa usa sa mga mihikling nga residente sa nasangpit nga area nga nadunggan na lang nila ang mga buto-buto apan wala sila’y nakitang mga armadong tawo.
Gani muabot sa kapin oras matud pa ang nabating buto-buto hangtod nga medisisyon na sila nga mohikling alang sa ilang kaluwasan.
Sumala niini nga nagtinabangay na lang matud pa sila nga 30 ka mga bubong sa maong area sa paghikling sa uban nga walay masakyan aron sa ingun matud pa nga mahimong dali nga makalingkawas gikan sa maong dapit
