BUTUAN CITY – Pormal nang gideklara nila Manila Mayor Francisco ‘Isko’ Moreno Dimagoso ug Dr. Willie Ong ang ilang intensyong mudagan pagka-presidente ug besi-presidente sa May 2022 local ug national elections.
Gihimo ang iyang deklarasyon sa may Basecommunity sa Manila, ang makasaysayanong lugar alang kang Mayor Isko tungod kay dinhi siya namasura niadtong bata pa siya ug karon gipatukuran na niya og pabalay alang niadtong mga wala’y kaugalingong pinuy-anan.
Kagahapon, pormal nga gi-anunsyo ang Moreno-Dr. Willie Ong tandem alang sa umalabot nga eleksyon kansa ang ikatulong kapilian sa katawhang Filipino sunod tuig human unang nagdeklara sa ilang pagdagan sila Senador Ping Lacson ka-tandem si Senador Tito Sotto ug ning mi-aging Dominggo lang si Senador Manny Pacquiao kinsa wala pa’y napiling ka-tandem.
Samtang sa iyang pagpamulong usab ni Dr. Willie Ong, gipadayag niining wala sa iyang plano ang pagdagan sa taas nga posisyon tungod kay igo na kaniya ang pagtabang sa mga masakiton ilabina nga dili niya gusto og gubot.
Usa lang ang iyang nabati ug kini mao ang pagtabang sa mga kabus ilabina sa mga medikal nga panginahanglanon ug mga health workers ug ang hanyag ni Yorme ang naghatag kaniya og ka-isog nga dawaton kini aron mapa-abot ang tanang ayuda sa gobyerno ngadto sa matag-Filipino.
