BUTUAN CITY – Parehong nalandig sa balay-tambalanan ang duha ka mga sakay sa motorsiklo human nabanggaan sa usa ka kotse pasado alas-otso kagabii sa may Brgy. Salvacion ning siyudad.
Sa eksklusibong pakighinabi sa Bombo Radyo Butuan, gipadayag ni Salvacion Brgy. Kagawad Primitivo Jagmoc, nadungog kaayo nila ang pagpaka nga klarong duna’y bangga.
Sa ilang pagresponde, ilang napalgan ang duha ka mga sakay sa motorsiklong parehong duna’y bali sa tiil ug daling gikarga sa ambulansya ang mga angol samtang nahulo gusab sa pangpang ang kotse nga gikan matud pa sa Brgy. Bilay ug padulong unta sa siyudad samtang ang motorsiklo usab pa-uli na sa Brgy. Maguinda.
Nakita pa usab ni Kagawad Jagmoc nga nangalagpot ang tulo ka mga lalaking sakay sa kotse ug paspas nga mikamang pataas ug sa ilang pagkuti-kuti, dinhi nasayran nga naka-inom og ilimnong makahubog ang wala pa nila ma-ilhing driver niini.
