BUTUAN CITY – Milampos ang grupo ni Romeo Ednilan nga makapahigayon og general assembly ang Diamond Transport Service Cooperative kon DATSCO kaganina sa covered court sa Brgy. 8, lungsod sa Buenavista, Agusan del Norte kansa gitambungan sa mga regular ug dili regular members dili ang dinhi sa dakbayan sa Butuan, Agusan del Norte ug Sur kondili apil na sa mga taga-Siargao Island, Surigao del Norte.
Sigon ni Edgar Pantojan, usa sa mga membro sa maong kooperatiba, kini nga general assembly lang ang gitugutan sa Cooperative Development Authority kon CDA-Caraga ug dili ang gipatawag ni DATSO chairman Evangelus Lawenko kagahapon.
Mala-umon silang pinaagi sa maong asembliya, makabaton na sila og klarong operasyon aron makabalik na sa ilang panginabuhian ang mga membro ug mga empleyado nga taud-taud nang nakulban og kaldero human gipahunong sa Land Transportation, Franchising and Regulatory Board kon LTFRB-Caraga ang ilang operasyon tungod sa kawala pagpahigayon sa maong asembliya.
Iyang gipasabot nga pinaagi sa asembliya, madunggan sa tanang membro ang tinuod nga estado sa ilang koop ug ang hinungdan sa mitumaw nga mga problema nga maoy hinungdan sa pagkahunong sa ilang operasyon.
Ang maong asembliya, gitambungan usab sa mga opisyal sa Land Transportation, Franchising and Regulatory Board kon LTFRB-Caraga ug sa Office of the Transportation Commission kon OTC.
Samtang gikumpirma ni CDA-Caraga assistant regional director Sally Joy Bungabong nga ilang gitugutan ang gipa-eskedyol nga general assembly kaganina sa DATSCO-Ednilan group human ang lima ka higayon nang pagsibog sa grupo nila DATSCO chairman Evangelus “Evans’ Lawenko sa una nang gi-aprubahang eskedyol tungod matud pa sa COVID-19 pandemic.
Sa eksklusibong pakighinabi sa Bombo Radyo Butuan, gipadayag nga Bungabong nga tungod sa wala pagtuman nila Lawenko sa una na nilang nasabutang pagpahigayon niini niadtong Agusto 25, dili na sila magtugot pa nga subling makapatawag og asembliya ang grupo ni Lawenko.
