BUTUAN CITY – Gikumpirma ni Leo Fabre, usa ka kanhi K9 handler sa In-House Security Protection sa United Nations Human Rights Commission sa Bagram, Afghanistan nga duna pa siya’y upat ka mga higalang atua pa sa maong nasud hangtud karon.
Kini human ang twin bombing sa may Kabul airport nga mikalas na og kapin sa 100 ka mga tawo.
Sa eksklusibong pakighinabi sa Bombo Radyo Butuan, gipadayag ni Fabre kinsa naka-quarantine na karon sa Pampanga human mi-abot sa Pilipinas ning mi-aging gabii nga duna pa siya’y ka-ubanang K9 handler nga si Ronald Balunsat kinsa mas gipiling magpabilin sa Afghanistan human sila gisa-aran sa Taliban nga dili hilabtan sa ilang trabaho.
Duna usab siya’y higalang si alyas Buloy nga atua sa Mazar-i-Sharif ug laing usa nga atua sa laing lokasyon kansa parehong layo sa capital Kabul og nagpadayag nga wala’y angayang kabalak-an sa ilang sitwasyon.
Gikumpirma usab ni Fabre nga wala na’y mga Pinoy na anaa sa Kabul Airport tungod kay na-repatriate na silang tanan adiser pa man ang pagbusikad.
Sa pagkakaron, wala pa’y plano si Fabre nga mubalik sa iyang trabaho tungod kay hatagan pa niya og igong panahon ang iyang pamilyang dugay nang nabuwag kaniya tungod sa iyang trabaho.
