BUTUAN CITY – Giklaro ni Agusan del Norte provincial board member Atty. James Reserva nga ang pagpasaka og kaso sa Pilipinas batuk sa China ngadto sa permanent court of arbitration, dili interest alang sa Pilipinas kondili alang sa Estados Unidos ug mga gamhanang nasud base na usab sa ilang sulsol.
Kini tungod matud pa sa ilang interest sa ingon madeklarang null and void ang pag-angkon sa China sa parte sa dagat nga sakop sa West Philippine Sea gamit ang gihingusgan nilang 9-dash line.
Bisan matud pa og gideklara sa korte nga null and void ang claim sa China tungod sa ilang gihingusgang 9-dash line , wala kini gi-contest sa China tungod sa ilang pagbarog sa ilang ebidensya.
Kini subay na usab matud pa kagustuhan sa China nga dili madeklarang international waters ang kadagatang sulod pa sa 9-dash line apan gawas na sa 12-nautical miles kondiin dinhi na ma-apply ang freedom of navigation base sa nagtunhay nga international law.
Kini usab matud pa ang hinungdan nga pursigido ang China nga mubahad sa mga nasud nga manghingusog nga musulod sa ilang 12-nautical miles ilabina sa pag-agi na karon sa aircraft carrier sa United Kingdom nga HMS Queen Elizabeth.
Gipasabot pa ni Atty. Reserva ang matag-nasud nga claimant sa kadagatang sikbit sa West Philippine Sea, duna’y gikuptang 12-nautical miles base na usab sa ilang katungod sa international waters kansa gi-define sa United Nations on the Convention of the Law of the Sea kon UNCLOS.
Sa eksklusibong pakighinabi sa Bombo Radyo Butuan, gipadayag ni Atty. Reserva nga ang sukod sa 12-nautical miles magsugod sa baybayon sa usa ka nasud ug wala’y laing nasud nga maka-claim niini ug wala usa’y maka-agi niining mga sakyanang pandagat kung wala’y pagtugot sa tag-iyang nasud.
Gawas niini, duna usa’y gitawag nga katungod sa usa ka nasud alang sa exclusive economic zone kon EEC.
Diha sa ECC, ang katungod sa hingtungdang nasud mao lamang ang pag-exploit sa mga rekursos naturales sa ilawom nga bahin niini, apan wala’y labot ang pag-agi diha mismo sa dagat o kaha ibabaw sa dagat tungod kay gikonsidera kining international waters.
