BUTUAN CITY – Excited na ang mga fans ug supporters sa Milwaukee Bucks nga makigsa-ulog sa victory parade ug party sa koponan human mikampyon sa 2021 NBA finals kagahapon human gilat-an ang Phoenix Suns sa score nga 105-98.
Kini ang gipadayag sa mga Bucks avid supporters nga sila Bernadette Acut Francie ug fiance’ niining si Jason Mays, lumad nga taga-Milwaukee ug mi-ipon na og puyo uban kang Bernadette sa Deer District sa Wisconsin, diin gihimo ang NBA finals kagahapon.
Sa eksklusibong pakighinabi sa Bombo Radyo Butuan sa mag-live in partner, gibutyag ni Jason Mays, nga hugot ang suportang gihatag sa katawhan sa Wisconsin ngadto sa Bucks kumpara sa ubang mga estado sa Amerika.
Disiplinado matud pa ang katawhan sa Wisconsin higayong duna’y dula ang ilang paboritong koponan ug bisan asa man mupadulong ang Bucks kung duna’y ilang dula, adtuan usab kini sa mga supporters.
Aminado sila Bernadette ug Jason nga mahal kaayo ang baligya sa mga tickets kagahapon kondin ang pinakamahal mu-abot sa 1,800-dolyares samtang ang pinakabarato mu-abot sa 450-dolyares kondiin dili na maklaro ang mga nagdula tungod sa kalayo.
Apan bisan pa man niini, daghan gihapon ang namalit ug makita matud pa ang pruweba niini sa mga tawong anaa gawas sa kurto sa Fisherv Forum kondiin dikit pa kaayo sila sa usa’g usa.
Bisan pa man sa hulga sa COVID-19 sa tibuok kalibutan, maklaro sa mga tawong nanan-aw sa final game kagahapon ug sa mi-agi pang mga dula nga wala na sila nagsuot og face mask ug wala na usab nag-obserba sa social distancing tungod sa ilang kadigkit kaayo atol sa dula.
Gipasabot sa duruha nga dili na hulga kanila ang COVID-19 ug balik na sa normal ang ilang kinabuhi.
