BUTUAN CITY – Gihikay na sa mga sakop sa Butuan City Police Station 4 ang tukmang kasong ipasaka batuk sa usa ka gidudahang rebeldeng New People’s Army kon NPA kinsa nadakpang bitbit ang mga improvised explosive devices ug mga war materials kaganinang alas-nueve sa buntag sa Purok 1, Brgy. Taguibo ning siyudad sa Butuan.
Na-ila ang suspek nga si Mamerto Salahay alyas Mert, 43-anyos, minyo ug residente sa Purok 12-A, Brgy. Poblacion, lungsod sa Sibagat, Agusan del Sur.
Sigon ni Taguibo Brgy. Kapitan Rogelio Dumadag, gitawagan na lamang siya sa mga sakop sa Butuan City Police Station 4 ug gihimong witness sa na-intercept nga 26 ka mga GI pipe bomb components, usa ka dakong rolyo sa leg wire, 4 ka mga blasting caps, detonating cords, usa ka kalibre .45 nga pistola nga duna’y 8 mga bala, 19 ka mga bala sa AK47 rifle, usa ka cell phone, ngkada-iyang mga ID cards ug hand held radio.
Sigon sa inisyal nga imbestigasyon, gipadayag matud pa sa suspek nga order kini kaniya ug iya na untang i-deliver dinhi sa Butuan apan wala kini gisulting pangalan atol sa pag-interrogate sa mga pulis kaniya.
