BUTUAN CITY – Gitaho sa Department of Health Center for Health Development – Caraga ang laing 21 ka mga kaso sa bag-ong variant sa COVID-19 cases nga na-dugang ning rehiyon kagahapon base na sa resulta sa Whole Genome Sequencing (WGS) sa mga samples nga gipadala ngadto sa University of the Philippines-Philippine Genome Center.
Sumala sa DOH-Caraga, 13 ang tested positive sa B.1.351 kon South African variant, 7 ang tested positive sa B.1.1.7 kon UK variant samtang usa ang nagpositibo sa P.3 kun Philippine variant.
Na-detect sa probinsya sa Surigao del Sur ang mga nagpositibo sa South African variant diin pito niini sa Bislig City, Lianga 4; Cortes 1 ug Tandag City 1 samtang gikan usab sa mga lungsod sa Barobo-2, Lianga 1; Madrid, Surigao del Sur 1, Butuan City 2; ug Esperanza, Agusan del Sur 2 ang nagpositibo sa UK variant ug usa ka kaso sa P.3 variant ang natala sa Tandag City.
Sumala sa DOH-Caraga, sa 21 ka mga kaso sa COVID-19 variant , 13 niini ang wala’y travel history, ug 8 ang adunay close contacts sa mga kaniadto nagpositibo sa maong virus.
Nakabalik na usab hinuon sa ilang normal nga panginabuhi ang 18 sa maong ihap nga mga asymptomatic na samtang nagpa-ayo pa ang usa nga karon naka-home quarantine na.
Duha usab ka mga kaso nga nagpositibo sa South African variant ang napatay samtang na-confine sa ospital kondiin usa niini gikan sa Bislig City samtang ang usa sa gikan sa Cortes, Surigao del Sur.
