BUTUAN CITY – Gipa-ilalom na sa counselling ang 9-anyos nga anak sa magti-ayong Rebuera human kini na-trauma sa iyang nakita dihang gipusil sa amahang pulis ang iyang inahan atol sa ilang paaglalis sulod sa ilang gi-abangang balay sa Brgy. Taft, Surigao City.
Sa eksklusibong pakighinabi sa Bombo Radyo Butuan, gipadayag ni PLCol. Glenn Sampaga, hepe sa Surigao City PNP nga bisan sila nakurat sa maong hitabo kondiin sa ilang pagresponde, pareho nang patay dihang ilang na-abtan ang magti-ayong PSSgt Jesryl Rebuera ug asawang si Marifel.
Sa ilang pakisusi sa mga silingan sa magti-ayon, nasuta nga sukad pa ning mi-aging mga adlaw sila nakadungog nga kanunay na kining maglalis apan pinakagrabe nag nahitabo ning mi-aging gabii human nga nakadungog na lang sila og mga buto sa armas.
Gipahiluna na sa pamilya sa magti-ayong Rebuera ang ilang patay’ng lawas ug anaa na usab sa ilang kabanay ang tulo nila ka mga anak nga pareho pang minor-de-edad.
