BUTUAN CITY – Misaad si Kapitan Rodencio Basubas Jr. sa Brgy. Ampayon ning siyudad sa Butuan nga dili siya mukanaog sa iyang katungdanan karong nakabalik na siya sa pwesto human ang unom ka buwang suspensyon.
Kini subay na usab sa gi-aprubahang ikatulong preventive suspension order nga girekomenda sa Sangguniang Panlungsod pinaagi sa resolution nga gipirmahan ni Mayor Ronnie Vicente Lagnada ug gi-serve gilayon kaniya, usa ka oras lang human sa iyang pagbalik.
Sa eksklusibong pakighinabi sa Bombo Radyo Butuan, gipadayag sa kapitan nga iyang barugan ang iyang paglingkod karon sa rasong ilegal matud pa ang ikatulong suspensyon ug nakita niyang duna kini bahid sa pulitika.
Kini ilabina nga ang mga kapitan sa Brgy.Villa Kananga ug sa Brgy. Libertad kinsa parehong duna usa’y suspension order, mag-usa ka tuig nang wala gi-serve sa city government human nga wala matud pa pirmahi sa mayor kansa nakita niyang tungod kini sa kamatu-urang kapartido matud pa sila sa administrasyong Lagnada.
