BUTUAN CITY – Padayon pang gi-imbistigahan sa kapulisan sa Cagwait Municipal Police Station sa Surigao del Sur ang natigayong pagpamusil-patay sa biktima nga si Ryan Pigurasyon, 23 anyos, usa ka collector ug residente sa nasangpit nga lungsod.
Sa eksklusibong pakighinabi sa Bombo Radyo Butuan, gibutyag ni P/Cpl Joseph Joy Riba, imbestigador sa nasangpit nga police station, nga pasado alas-11:30 kagahapon sa sayong udto nahitabo ang insidente sa Sitio Tagbalidbid, sakop sa maong lungsod.
Posible matud pang gisundan ang biktima tungod kay kung basehan ang mga samad pinusilan, na-igo man kini sa ulo ug sa likod.
Sa kasamtangan, nakapahiluna na ang patay’ng lawas sa biktima sa usa ka punerarya sa lungsod sa Marihatag, Surigao del Sur.
Misaad usab ang kapulisan nga paningkamotan nila nga makuha ang saktong impormasyon aron masusi ang tinood nga motibo sa pagpatay sa biktima ilabina nga anaa kini sa mingaw nga bahin sa maong lugar ingon man layo usab sa kabalayan.
