BUTUAN CITY – Gikadismaya ni Kapitan William Martinez sa Brgy. Santa Maria, lungsod sa Trento, Agusan del Sur ang kawala’y koordinasyon sa pulis nga si PLt. Arnold Sarong ngadto kaniya kung gusto ang niining i-verify ang special permit sa gipahigayong sabong niadtong Sabado.
Sa gipatawag niining press conference, gipadayag sa kapitan nga legal ang derby tungod kay niadto pa lang Pebrero 24, nag-isyu na og special permit si Mayor Wiliam Calvez sa aplikasyon ni Julie Capistrano kansa furnished copy pa ang Trento Municipal Police Station sa mismong adlaw nga gi-isyu ang permit.
Kung duna matud pa’y mga kwestyon ang police station, dapat gipatawag na gikan sa Pebrero 24 adiser ang derby sa Pebrero 27 aron mahikay dayon ugaling duna’y kulang.
Apan wala magpatawag og personahe sa panig sa organizer ang maong police station rason nga gipadayon ang derby samtang gipilit ang special permit dapit sa pultahan nga makita sa tanang mga tawong musulod sa buwangan.
Aminado si Kapitan Martinez nga nakita niya ang tanang panghitabo tungod kay anaa siya sa ikaduhang andana sa ilang sabungan dihang misulod si PLt. Arnold Sarong sa wida nga wala magbutyag kung unsa ang iyang tuyo ug gisulayan pag-ilog ang manok nga gikuptan sa biktimang si Arthur Hamboy.
Dihang wala niini nakuptan ang manok, dinhi na niya gibunlot si Hamboy ug gi-ipitan sa iyang kamot samtang napa-ud sa iyang dughan.
Mikisi-kisi matud pa si Hamboy tungod kay wala siya’y sala gawas nga nasayod matud pa kining legal ang derby ug dinhi na matud pa kini gitiro og dul-it sa pulis.
Nakadagan pa si Hamboy human nasiko si Sarong apan gipusil kini dihang hapit na sa pultahan rason sa pagka-igo niini sa tiyan ug natumba na.
Dali kining gidagan sa kapitan kondiin na-abtan pa niya kining nagginhawa pa hangtud nga miduol kaniya ang intelligence officer kinsa nagsulting patay na matud pa kini rason nga iyang gisukmatang ilang gipatay ang biktima.
