BUTUAN CITY – Gi-activate na ang tibuok pwersa sa Agusan del Sur Provincial Disaster Risk Reduction and Management Operations Center (PDRRMOC) aron matubag ang posibleng epektong ihatud sa tropical storm Auring ilabina nga gipa-ilalom na sa signal number 1 ang Agusan del Sur partikular ang mga lungsod sa San Francisco, Rosario, Bunawan, Trento ug Sta Josefa ingon man ang Surigao del Sur partikular ang mga lungsod sa Bayabas, Cagwait, Marihatag, San Agustin, LInaga, Barobo, Tagbina, Hinatuan, Lingig og Bislig City.
Sa pakighinabi sa Bombo Radyo Butuan, gipadayag ni Alfredo Nonoc Plaza ang provincal information officer sa Agusan del Sur, gi-abisuhan na ang mga residente ilabina kardtong mga nagpuyo sa mga identified low-lying areas nga daling mabahaan ingon man kadtong mga nagpuyo duol sa Agusan river nga muhikling na ug dili na maghulat nga muigo pa ang maong bagyo.
Sumala ni Plaza duna na sila’y coordination meeting tali sa ubang ahensya aron matubag mga panginahanglanon sa mga ma-igo og maayo sa bagyo gikan sa pagkaon alang sa mga mihikling nga residente hantod na unya sa mga ekwepo nga gamiton sama sa chainsaw, rubber boats ug uban pa.
Gipadayag usab ni Plaza nga andam ug igo ang ihap sa mga standby personnel sa ilang tagsa-tagsa ka munisipalidad nga maoy mulihok unya ugaling dunay manginahanglan og tabang o kadtong mga na-stranded nga indibidwal.
Samtang nagdeklara na usab og Code “White” Alert Status ang probinsyal nga panggamhanan sa Agusan del Norte diin 24/7 usab nga aktibo ang Emergency Operations Center sa PDRRMC alang sa pagtubag unya sa posibleng epekto ni Auring samtang nag-abiso na usab ang Butuan City Risk Reduction and Management Office sa publiko nga pangandaman ang paghapak sa bagyo.
Nagpahigayon na usab og panagtagpok ang mga opisyales sa probinsya Dinagat Islands pagpanguna ni Governo Arlene ‘Kaka’ Bag-ao ug ang Surigao del Sur ug karong adlawa nagtakda og zoom meeting angmga opisyal sa Surigao del Norte isip pagpangandam alang sa paghapak unya sa bagyong Auring.
