BUTUAN CITY – Posibleng dili pa mahatagan og kasulbaran sa labing daling panahon ang giproblema sa katawhan sa pipila ka mga barangay ning siyudad sa Butuan kalabot sa poste sa Agusan del Norte Electric Cooperative kon ANECO nga anaa taliwa sa lane sa gipalapdang kalsada human nasulod sa road widening.
Kini tungod sa managlahing baruganan tali sa ANECO ug sa Department of Public Works and Highways kon DPWH-Caraga sa nakalatid sa Memorandum of Agreement nga ilang gisudlan alang sa ingon niini nga mga problema.
Nasayrang sentro sa batikos ning sibyahan ang maong sitwasyon tungod kay pipila na ka mga aksidente sa kadalanan ang nahitabo tungod niini ilabina sa mga lugar nga wala’y suga.
Dihang gipa-abot ning sibyahan ang maong isyu ngadto sa ANECO, gipadayag sa ilang tigpamaba nga si Irene Yee nga mabalhin lang nila ang mga posteng nasulod pa sa bag-ong lane sa gipadak-ang kalsada kung hatagan na sila og budget sa DPWH.
Giklaro ni Yee nga wala’y kwartang ikagasto ang ANECO alang sa pagbalhin sa maong mga poste.
Aminado si Yee nga kinahanglan nang mabalhin ang mga posteng anaa pa taliwa sa dalan aron malikayan na ang mga disgrasya ug kini mahitabo lang kung magpakabana matud pa ang duha ka panig.
Apan sa panig usab sa DPWH-Caraga, gi-angkon sa ilang tigpamaba nga si Connie Calo nga duna’y memorandum of agreement ang ilang ahensya uban sa ANECO alang sa pagbalhin sa mga poste.
Nakalatid matud pa sa kasabutan nga ang ANECO ang mukuha ug mubalhin sa poste samtang ang DPWH lang ang mu-reimburse sa ilang gasto kansa sukwahi sa gipadayag ni Yee nga mangayo sila og kwarta aron magamit sa ilang pag-balhin sa mga niini.
Base sa iyang nasayran gikan sa ilang Legal Department, gihulat na lang nila ang independent assessment nga isubmite sa ANECO aron magtukma sa ilang ihatag nga replacement cost.
