BUTUAN CITY – Hangtud lang una karong Sabado, Disyembre 20 ang pagdunggo sa Ro-Ro vessel nga Our Lady of Triumph sa Masao Port nga sakop sa Brgy. Lumbocan ning siyudad, base sa pagkumpirma ni Michiko de Jesus, tigpamaba sa Butuan City government.
Sa eksklusibong pakighinabi sa Bombo Radyo Butuan, gibutyag niining bisan og niadto pa lang Dominggo, Disyembre 13 ang unang pagdunggo sa Ro-Ro vessel sa maong pantalan, apan kinahanglan una nilang mag-holiday break ug mubalik na ang ilang full operation sa Enero 10 sunod tuig 2021.
Dinhi na dayon magsugod ang tag-tulo ka adlaw kada-semana nila nga regular nga biyaheng gikan sa Cebu City ug vice versa kondiin mu-abot sila sa Masao Port sa mga adlaw’ng Dominggo, Miyerkules ug Biernes sa alas-sais sa buntag ug mubiya sa alas-sais usab sa gabii.
Ang pagdunggu-an sa maong Ro-Ro vessel dako og ikatabang alang sa kalambuan ning siyudad ilabina sa Brgy. Masao ug Lumbocan apil na sa mga residente tungod kay ubay-ubay man unya ang mahatagan og trabaho.
Plano matud pa sa lokal nga kagamhanan nga makig-alayon pa sa tag-iya sa maong barko aron maghatag og biyahe sa laing mga siyudad sama sa Manila ingon man sa Bohol.
