BUTUAN CITY – Wala pay opisyal nga pamahayag ang kadumalahan sa D.O. Plaza Memorial Hospital sa Agusan del Sur human gideklarang COVID-19 suspect ang batang gidala sa maong ospital nga namatay dihang napa-akan og bitin sa ilang panimalay samtang nagbasa og modules ning mi-aging adlaw.
Naila ang biktima nga si Shiela Mea Lovite, 11-anyos, residente sa P7, Patin-ay, Prosperidad Agusan del Sur.
Una nang gisaysay sa inahan sa biktima nga si Jasmine Lovite, nga samtang nagtuon sa iyang modules ang anak kalit lang nga adunay nipaak niini ug sa dihang ilang gisusi misugat matod pa kanila ang duha ka paak kansa nagdugo nga gituohan nilang pinaakan sa bitin.
Wala’y laing mabasol si Jasmine kundi ang kaugalingon dihang nagkumpyansa lang siya nga maayo na ang kahimtang sa anak human gipahidan lang og lana ug ulahi na nilang nabantayan nga wala na kini kinabuhi human nananghid nga matulog lang kadali.
Mas midoble pa hinuon ang gibati niining kasakit dihang gideklarang suspek sa COVID-19 ang anak human gidala sa maong ospital ug gimanduan nga gilayon kining ipalubong ang patay’ng lawas niini.
Base sa adivory sa Department of Health tanang isulod o e admit sa usa ka ospital kinahanglang ipailawom sa COVID-19 SWAB Test sa tumong nga masigurong luwas sa peligro ang mga doktor ug nurses nga mu-atiman sa pasyenti.
