BUTUAN CITY – Nagpabiling luwas gikan sa African Swine Fever kon ASF ang Caraga Region bisan pa man sa natalang isolated case niini sa Brgy. Matho lungsod sa Cortes, Surigao del Sur.
Gikumpirma kini ni Dr. Apple Jarumahum, ang ASF focal person sa Department of Agriculture kon DA-Caraga sa eksklusibong pakighinabi sa Bombo Radyo Butuan.
Sigon sa opisyal, human nila nakumpirma sa unang semana ning bulana ang kaso sa ASF, dali gilayon silang mihimo og mga lakang aron kini ma-contain ug apil na niini ang pagpatuman og siete ngadto sa 10-kilometros nga radius sa pagsusi nila sa mga babuyan.
Human ang pila ka adlaw nga pagsusi ug nakumpirmang wala na makagawas pa gikan sa ground zero ang maong kontaminasyon nagpagawas gilayon og executive order si Mayor Josie Bonifacio nga nagdili sa pagpagawas sa mga binuhing baboy sa ilang lungsod ug ingon man ang pagpasulod niadtong gikan sa kasikbit nga mga lungsod rason nga ang gikunsumong baboy sa katawhan sa Cortes, naggikan lang sa ilang lungsod.
Migawas sa imbestigasyong gihimo sa National Meat Inspection Service kon NMIS-Caraga nga nakasulod ang kontaminasyon sa maong lugar tungod sa mga paglusot sa mga gipamaligyang processed food products nga gikan sa Davao Region kansa daan nang duna’y kaso sa maong sakit.
Aron masigurong wala na’y matala pang laing kaso sa ASF ang Caraga Region, mas pakusgon pa nila ang ilang information campaign aron mas mahimong aware ang mga tawo.
