BUTUAN CITY – Dili palabyon ni Dr. Marilou Dedumo – schools division superintendent sa Department of Education kon DepEd-Butuan City Division ang gihimo sa usa ka magtutudlong hubog og midaro sa pipila ka mga sakyanan ning mi-aging gabii rason sa pagka-angol sa pipila ka mga indibidwal ug sa iyang pagkatanggong sa Butuan City Police Station kon BCPS-3.
Sa eksklusibong pakighinabi sa Bombo Radyo Butuan, gipadayag ni Dedumo nga mismong ang district supervisor ang nagpahibalo kaniya kalabot sa insidenteng nalambigitan ni Arnold Cañonero, 38-anyos, minyo, residente sa Purok 6, Brgy. Bancasi ning siyudad ug nagtudlo sa FT Magno Elementary School sa susamang barangay.
Iya nang gimando ang pagsubmite kaniya og narrative report base sa nakalatid sa police blotter aron makapanaog siya ug tukmang aksyon.
Dili matud pa siya makatugot nga dii maleksyon ang maong magtutudlo ilabina nga nag-inom kini sa adlaw nga nasulod sa school days kansa hugot nga gibawal kanila sa DepEd.
