BUTUAN CITY – Lain na usab nga estudyante ning rehiyon sa Caraga ang naghikog-patay tungod sa pagproblema sa iyang mga modules.
Ang ikaduha na nga biktima sa modules ning rehiyon mao ang usa ka 17-anyos nga lalaking grade-11 student nga taga-Brgy. Maon ning siyudad kinsa napalgan na lang nga nagbitay na pasado alas-siete kagabii.
Sigon ni Kapitan Oliver Bob Vicente, gigamit paghikog sa biktima ang pisi nga panghikot sa manok kondiin gidali pa kini pagdala sa ospital apan gideklara nang dead on arrival.
Sa eksklusibong pakighinabi ning sibyahan, gipadayag ni Kapitan Vicente nga hilumon matud pa ang biktima kinsa bugtong anak sa ginikanang duna’y negosyong photography.
Posible matud pang na-pressure ang biktima sa iyang module ug nadugangan pa sa mga dili maayong mabasang posts sa social media ug naa pay mga silingan nga magpatugtog og kusog rason nga dili matarong ang ilang pagtuon.
Sa inisyal niyang nasayran, ang problema sa modules maoy yangungo sa biktima nga usahay dili matagad tungod sa ka-ukupado usab sa ilang panginabuhian.
Wala pa usab maka-pass sa iyang first quarter modules ang biktima.
Tungod niini, plano ni Kapitan Vicente nga musulat sa Department of Education kon DepEd-Butuan City Division aron hangyuong muhimo og intervention sa ingon duna’y kanunay nga komunikasyon ang mga bata ug magtutudlo malikayan na nga ma-usab pa kini nga insidente.
Pinaagi usab niini, muhupay ang kalibog og stress nga bation sa mga bata nga hatud sa lisod nilang mga modules ug masayran usab sa mga bata ang ilang gibating kalibog.
Nasayrang kini na ang ikaduhang kaso sa pagtubok dinhi sa Caraga Region tungod sa problema sa mg modules kondiin ang usa didto sa Hinatuan, Surigao del Sur nga usa ka Grade-8 nga dalagitang Higaonon.
