BUTUAN CITY – Pursigido ang lokal nga kagamhanan ning siyudad sa Butuan nga aksyunan gyod ang 28 ka mga vendors ug stall owners sa Salvador Calo Public Market kon mas nailang Langihan Public Market nga nagsubmite og peke nga rapid test negative results aron lang makapaninda na og balik.
Sigon ni Atty. Moshie Ariel Cahoy, sa Legal Office sa Business Permits and Licensing Division ning siyudad, ila na kining napa-abot ngadto sa National Bureau of Investigation kon NBI-Caraga ug hayan ma-aksyunan na kini human sa gihimong disinfection sa ilang buhatan tungod kay pursigido man ang na-agrabyadong mga diagnostic centers ug laboratories nga mupasaka og kaso.
Napa-blotter na usab nila kini sa Butuan City Police Station 2 kansa maoy himuon unya nilang basehan sa pagpasaka og kaso.
Giklaro ni Atty. Cahoy nga duha ka higayon na nilang gipangduol ang maong mga market occupants aron mupa-ilalom sa libreng rapid test sa city government apan mingbalibad sila ug didto na hinuon nagpa-rapid test sa nag-canvass kanila diin pekeng resulta ang migawas.
Kini ang usa sa gitu-uhang mga hinungdan sa paspas nga pagsaka sa COVID-19 local transmission cases tungod sa posibilidad nga positibo sa coronavirus ang uban nga mga nagsubmite og peke nga mga rapid test negative results.
Samtang sa panig usab sa city government, gihikay na sa Office of the City Economic Enterprise kon OCEE ang pagkansela sa ilang certificate of ownership sa stalls nga ilang gi-ukupahan samtang sa panig usab sa BPLD, hikayon na usab nila ang pagkansela sa ilang business permits.
