BUTUAN CITY – Nadungagan pa og 3 ka bag-ong patay samtang laing 40 ka COVID-19 positive cases ang Caraga Region.
Sa Online press briefing kagabii gikumpirma sa Center for Health Development Caraga nga sa nadawat nilang 139 ka mga RT-PCR confirmatory results gikan sa GeneXpert Reference Laboratory sa Butuan Medical Center, Northern Mindanao ug Davao region molecular laboratories, 99 ang tested negative ug 40 ang nagpositibo sa COVID-19 virus.
Sa 40 ka kumpirmadong positive cases, 17 ang mga nadugang nga local transmission cases, 15 ang dunay close contacts sa kanhi confirmed local transmission cases, 4 ang non-medical frontliners, 3 ang Locally Stranded Individuals ug usa ang health care worker.
Sa mga bag-ong kaso nga nataptan, 5-anyos ang pinakabata ug 74-anyos ang pinakatigulang diin 24 sa mga niini ang babaye samtang 16 ang mga lalaki. Sigon ni DOH-Caraga Regional Director Jose Llacuna, Jr., ang mga kumpirmadong kaso nagsumikad sa Agusan del Norte- pinaagi sa mga lungsod niini sama sa Buenavista nga dunay 4 ug RTR (3); tag-usa usab sa Bayugan City ug San Francisco, parehong sakop sa Agusan del Sur ingon man ang probinsya sa Surigao del Sur- Lianga , ug Cantilan nga dunay tag-usa ug Butuan City nga dunay 29.
Ang mga confirmed cases sa Butuan mga residente sa Brgy. Limaha 5, Doongan, Obrero ug Libertad nga duna’y tag-4, duha sa Mahogany, samtang tag-usa sa Agusan Pequeño, Baan Km3, Bancasi, Bit-os, Fort Poyohon, J.P. Rizal, Lumbocan, Masao, Pangabugan ug Tandang Sora.
Sa mga bag-ong kaso sa rehiyon, 26 ang asymptomatic, 11 ang duna’y mild symptoms ug usa ang nakasinati og severe symptoms.
Sa kasamtangan ang COVID-19 confirmed positive cases sa Caraga region mi-total na sa 589 diin 367 recoveries nga hingpit nang nakagawas ug 13 na ang namatay human nadugang ang katapusang tulo.
Ang bag-ong tulo ka patay, pulos mga residente sa Butuan City nga anaa sa edad 50 hantod 70 anyos, diin duha ang lalake ug usa ang babaye. Dunay lahing gihambin sakit ang mga niini sama sa diabetes ug hypertension.
Ang tanang kaso nakasinati og hilanat, pag-ubo ug lisod sa paginhawas adtong ikaupat nga semana sa Augusto, ug gi-admit 3 hantod 7 ka adlaw human nakasinati sa simtomas.
Sa pagpailalom kanila sa intensive care management,migrabe ang ilang condition ug namatay paglabay sa 3 hantod 5 ka adlaw sa ilang admission.
