BUTUAN CITY – Gipa-ilalom sa lockdown sugod ning adlawa ang Brgy. Ambago ning siyudad human nga mi-abot pa sa 25 ang ilang aktibong kaso sa COVID-19 nga nagpuyo sa lima ka mga purok .
Sigon ni Kapitan Alex Rosal sa eksklusibong pakighinabi sa Bombo Radyo Butuan, ipatuman kini base na usab sa pag-apruba sa lokal nga kagamhanan aron makontrola ang pagsulod-gawas sa mga residente nga grabe matud pa kagahi-an sa mga ulo.
Gipanawagan ni Kapitan Rosal ang tanang ginikanan sa ilang barangay nga maoy mag-monitor sa ilang mga anak ug dili pagawason ang mga dili angayang makagawas tungod kay dili matud pa nila ma-ato pagbantay ang tanang manggawas.
Sigon ni Kapitan Rosal, angayang bantayan og maayo sa mga ginikanan ang ilang mga bata tungod kay apil sa aktibong kaso sa ilang barangay ang usa ka 10 ka buwan pa lang nga bata kansa dapat makwestyon tungod kay dili kini mataptan sa maong sakit kung wala nakagawas sa balay.
