BUTUAN CITY – Mi-abot sa 30 ka mga indibidwal ang nagpositibo sa rapid test nga gipahigayon sa Brgy. Libertad kagahapong adlawa.
Sa pakighinabi sa Bombo Radyo Butuan kang Kapitan Menchie Rosario, gibutyag niini nga anaa sa 150 ang katibuk-ang gi-rapid test ug dili tanan gikan sa nasangpit nga barangay tungod kay 4 niini gikan sa Brgy Doongan, tag-usa sa Bonbon ug Dumalagan ug 2 sa Brgy. Ambago samtang 21 ang mga residente sa Brgy Libertad.
Gipahibalo gilayon nila ang resulta ngadto sa mga hingtungdang barangay kapitan aron masugdan na ang contact tracing sa ilang mga nakahugoy-hugoy.
Wala na gipapa-uli ang mga nagpositibo sa rapid test ug gihatagan na sila og libreng pani-udto kagahapon samtang naghulat sa ilang gamit nga dalhon paingun sa isolation facility sa Brgy. Taguibo.
Dako ang pagpasalamat ni Kapitan Rosario tungod sa pagnegatibo niini sa rapid test rason nga makapadayon pa siya sa pagpanerbisyo sa iyang ginsakupan.
Nanghinaut si Kapitan Rosario nga unta dili na madugangan ang mga nagpositibo sa rapid test atol sa ikaduhang hugna nga ipahigayon karung adlawa sa maong barangay ug unta usab magnegatibo sa swab test ang mga nagpositibo na.
Plano sa mga opisyales sa Brgy. Libertad nga himoon sa sunod nga mga adlaw ang disinfection sa ilang merkado publiko aron makalikayan sa hingpit ang maong sakit.
