BUTUAN CITY – Gipahimangnuan sa Bureau of Fisheries and Aquatic Resources kon BFAR-Caraga ang katawhan nga dili una mamaligya, mupalit ug labaw sa tanan mukaon og mga kinhason ug uyap gikan sa Lianga Bay sa Surigao del Sur.
Base kini sa Shellfish Bulletin No. 15 Series of 2020 nga gipagawas sa maong ahensya kagahapong adlawa aron malikayan ang posibleng pagkahilo.
Sa pinaka-ulahing mga laboratory results sa BFAR-Caraga ug sa mga Local Government Units, ang mga kinhason nga nakuha gikan sa kabaybayunan sa Dauis ug Tagbilaran City sa Bohol; Tambobo Bay, Siaton ug Bais Bay sa Bais City sa Negros Oriental; Cancabato Bay sa Tacloban City sa Leyte; Balite Bay sa Mati City, Davao Oriental; ug Lianga Bay, positibo pa gihapon sa paralytic shellfish poison nga lapas sa regulatory limit.
