BUTUAN CITY – Lisod pa gihapon alang sa mga media entities ning rehiyon sa Caraga ilabina dinhi sa dakbayan sa Butuan ang pagdawat sa memorandum circular nga gipagawas ni Philippine National Police kon PNP Director General Archie Francisco Gamboa.
May kalabutan kini dili paghatag og access sa tanang mga police stations sa tibuok nasud ngadto sa mga mediamen sa mga unod sulod sa blotter book.
Kaganina, atol sa gihimong virtual press conference sa Butuan City Police Office kon BCPO uban sa mga kadagkuang opisyal sa Police Regional Office kon PRO-13, gipasabot ni information officer PMajor Renel Serrano nga ang lakang sa ilang PNP chief, isip pagsunod na usab sa Republic Act 10173 kon mas nailang Data Privacy Act of 2012 kondiin ang mga vital information sulod sa blotter book, kinahanglang dili ipasilib sa media.
Tungod niini, isugyot ni Major Serrano nga ang tanang mga police stations, kinahanglang magtudlo og ilang information officer aron maoy mutubag sa mga pangutana sa mga tigbalita kalabot sa gusto nilang masayrang panghitabo.
Gidugang ni Major Serrano, nasabtan niya nga ang matag-public affairs programs sa mga radyo ug telebisyon, duna’y kinahanglanong impormasyon kalabot sa mga dagkong panghitabo sulod sa nakalabay’ng 24-oras rason nga kinahanglang andam usab niini ang kapulisan.
Gipasalig niini nga sa iyang kabahinan isip usa ka kanhi media man, bukas ang iyang line of communication sulod sa 24-oras alang niadtong duna’y gustong mukuha kaniya og impormasyon.
