BUTUAN CITY – Gidepensahan sa usa ka Butuanon nga naka-uli kagahapon gikan sa kauluhang Manila ang iyang nag-viral nga post kalabot sa pagpagawas niya sa iyang kasubo human wala makab-ot sa iyang expectation ang gila-uman niyang abtan ilang isolation facility sa Brgy. Taguibo.
Sa eksklusibong pakighinabi sa Bombo Radyo Butuan, gpadayag ni Honey Gutierrez nga uban niya sa iyang pagpa-uli ang iyang mga anak nga nag-edad og 10-anyos; 7-anyos nga kaluha ug siyam ka buwan.
Aminado siyang sa orientation pa lang, nangayo na daan og dispensa ang nag-orient kanila kalabot sa kulang nga katre ug foam apan tungod sa reklamo sa iyang mga anak sa kabugnaw sa sawog diin banig lang ang ilang hapin, rason nga nag-post siya sa social media.
Apan giklaro ni Gutierrez nga okey na ang ilang sitwasyon karon human nga nagpahatud siya og foam sa iyang pamilya.
Wala lang siya magdahom nga nanaghan ang shares niini rason nga duna na’y mga pribadong indibidwal nga naghatud kanila og ginagmay nga hinabang nga posibleng naluoy sa ilang sitwasyon.
Mapasalamaton hinuon si Gutierrez sa city government tungod sa libreng pagkaon ug tubig nga gihatag kanila kada ka-anan.
Ang iya na lang gi-ampo nga unta sa ilang pagpa-ilalom sa rapid test lima ka adlaw gikan karon, wala’y magpositibo kanila aron maka-uli na sila ug didto na mupadayon pag-self isolate sa ilang balay tungod kay pwede na matud pa silang maka-uli paglabay sa usa ka semana kung magnegatibo lang ang resulta sa rapid test.
