BUTUAN CITY – Magmugna og hotline karong adlawa ang Special Investigation Task Group kon SITG-Apoliario aron maoy dangpan sa tanang mga indibidwal nga nabiktima sa Kabus Padatoon kon KAPA Community Ministry International Incorported ni Joel Apolinario human kini nadakpan sa Brgy. Salvacion, Lingig, Surigao del Sur.
Sa eksklusibong pakighinabi sa Bombo Radyo Butuan, gibutyag ni SITG-Apolinario spokesman PMajor Renel Serrano nga gipahibalo na niini ang tanang mga police stations sa tibuok Caraga Region aron ubos sa maong hotline, ilang i-cater ug i-assess ang tanang mga reklamo batuk sa KAPA ilabina niadtong gusto pang makuha ang ilang na-pay in nga dagkong kantidad sa kwarta.
Sa pagkakaron, anaa na sa kostudiya sa Butuan City Police Office kon BCPO si Apolinario ug ang iyang nadakpang asawa uban sa lain pang 24 niini ka mga alipores.
Gibantayan sila sa mga sakop sa Butuan City Mobile Group ug Regional Mobile Force Battalion nga maoy mi-abag sa BCPO.
Dugang ni Major Serrano, nagtugon na si P/Brig. Joselito Esquivel Jr. nga gidili ang pagpakig-istorya ngadto sa mga suspek apan kung gusto makig-istorya kinahanglang mangayo una og clearance gikan sa regional director.
Dugang pa ni Serrano, nga pormal nang napasaka pinaagi sa inquest proceedings ang upat ka mga kaso batok ni Apolinario ug naghulat na lamang sila og resolusyon gikan sa fiscal aron ilang masayran ang sunod nga lakang nga ilang himuon batuk sa mga dinakpan.
Nag-execute matud pa og waiver si Apolinario nga subject pa sa preliminary investigation.
