BUTUAN CITY – Hugot nga gikondena sa Indigenous People Mandatory Representative kon IPMR sa San Miguel, Surigao del Sur ang lain na usab nga pagpatay sa rebeldeng New People Army ngadto sa usa ka sibilyang tribung Manobo sa Purok-2 Sitio Sangay Barangay Libas-Sud ning mi-aging hapon.
Sa pakighinabi sa Bombo Radyo Butuan, gipadayag ni Datu Rico Maca, IPMR representative sa San Miguel, Surigao del Sur, nagpagawas na sila uban ang Sangguniang Bayan sa maong lungsod og resolusyon nga nagkondena sa wala’y kaluoy nga pagpatay sa mga rebeldeng NPA kang Jomar Ignacio Engayas, 46-anyos byudo ug dunay duha ka mga anak nga nagtungha pa sa elementarya.
Sigon ni Datu Maca gidudahan lamang ang biktima nga asset sa kasundaluhan human kini taud-taud nga nawala sa ilang lugar tungod sa pagpamulawan sa Agusan del Sur.
Base sa ilang pakighinabi sa manghod sa biktima, layo pa lamang nakita na nila ang mga rebeldeng padulong sa ilang direksyon kondiin kalmado lang nga nag-ingkod ang biktima tungod kay nagtuo kini nga wala’y dautang mahitabo rason nga nakurat na lang kini dihang gidala na lamang kini sa kasagbutan sa gilay-ong 50- metros ug milanog na ang duha ka kusog nga buto armas.
Gawas sa samad-pinusilan naka-angkon usab og samad-tinigbasan sa li-og ang biktima.
Blangko usab ang komunidad sa motibo sa pagpatay sa mga NPA kang Engayas sanglit dili kini CAFGU member o kaha tribal leader tungod kay nagpakabuhi lamang kining normal.
Nakig-alayon na ang ang IMPR sa mga sundalo ug kapulisan aron mapasakaan og kaso ang mga responsable ingon man naghatag na usab og finanacial assistance ang lokal nga kagamhanan sa lugar ngadto sa pamilya sa biktima.
