BOMBO BUTUAN – Ang official statement na lang gikan sa lokal nga kagamhanan ning syudad sa Butuan ang gihulat karon sa kadumalahan sa Bancasi Airport ingon man sa Civil Aviation Authority of the Philippines kon CAAP- Butuan apil na sa mga airline companies aron hingpit nang mabalik ang commercial flights sa nasangpit nga tugpahanan.
Kini ang giklaro ni CAAP Butuan area manager Evangeline Daba human gikwestyon kalabot sa wala madayon nga subling pagbukas sa Bancasi Airport nga una untang gitakda niadtong hulyo 5 human sa pagtapos na sa moratorium niadtong Hulyo 4.
Sa eksklusibong pakighinabi sa Bombo Radyo Butuan, gipadayag ni Daba nga gisugyot kanila sa city government nga ipa-ilalom sa rapid test ang mga pasaherong mangabot ug mibiya sa maong tugpahanan.
Ang pirmadong official statement o guidelines na lang matud pa sa Butuan City-LGU kalabot niini ang ilang gihulat aron ila kining ipatuman tungod kay ila usab matud pa kining ipasa ngadto sa ilang sentrong buhatan.
Hangtud karon, wala’y gitunol kanila ang administrasyon ni Butuan City Mayor Ronnie Vicente Lagnada ilabina nga gustong masayran sa mga airline companies kung unsa ang unod sa guidelines ilabina sa kapasidad sa pasakyong mga pasahero.
Aminado usab si Daba nga gikwestyon karon sa Cebu Pacific kon CebPac ang proposal sa city government ilabina sa pagpa-rapid test sa mga mugawasay nga pasahero.
Kini tungod kay daan na matud pang duna sila’y bitbit nga mga medical certificate pamatuod nga negatibo sila sa COVID-19 rason nga mas angayang ipa-ilalom niini ang mangabutay lang nga mga pasahero.
