BUTUAN CITY – Mi-abot na sa onse ang kumpirmadong kaso sa COVID-19 sa Caraga Region human nakatala og tulo ka mga bag-ong kaso ang Department of Health kon DOH-Caraga nga pulos gikan sa lungsod sa Buenavista, Agusan del Norte.
Kini mao ang usa ka 32-anyos nga lalaking naka-abot niadtong Mayo 23 via land trip gikan sa Quezon City, ikaduha ang usa ka 28-anyos nga lalaki ug usaka 22-anyos nga babayeng parehong naka-abot niadtong Mayo 27 via airplane nga mitugpa sa Bancasi Airport gikan sa Cebu City kinsa parehong mga asymptomatic.
Sa eksklusibong interview sa Bombo Radyo Butuan, gikumpirma ni Buenavista Mayor Norbert Pagaspas nga sukad sa paghidangat sa maong mga locally stranded individuals, wala pa maka-uli sa ilang pinuy-anan ang duha ka mga lalaki gawas sa babaye nga gipa-ilalom sa istriktong home quarantine human mipasar sa gi-require sa Inter-Agency Task Force.
Dugang pa ni Mayor Pagaspas, ila gilayong sugdan ang himuong pagpanubay aron masuta kung duna sila’y mga local contacts sa ilang paghidangat.
