BUTUAN CITY – Giklaro ni Butuan City Mayor Ronnie Vicente Lagnada nga nakuha gikan sa mga imported sources ang tulo ka mga nagpositibo sa COVID-19 dinhi sa siyudad human nga natala ang ikatulong kaso pinaagi sa usa ka 10-anyos nga batang babaye.
Sa eksklusibong pakighinabi sa Bombo Radyo Butuan, gipadayag sa mayor nga base sa ilang gihimong monitoring, natumbok nila ang tulo ka mga sources sa nasangpit nga mga kaso nga gikan sa Metro Manila, Davao City ug China.
Kini karon ang tuburan sa subsob nga contact tracing nga ilang gihimo bisan og naayo na ang usa sa tulo human nga sayong nadiskitahan gamit ang rapid anti-body test kit kansa inisyatiba sa local nga kagamhanan aron mapaspasan ang pagtumbok sa mga makonsiderang persons under monitoring ug patient under investigation kung hisgutan ang daang kategoriyang gigamit sa Department of Health.
Aminado ang mayor nga accredited sa DOH ang maong test kit apan kinahanglan pang i-validate sa ahensya ang resulta niini pinaagi sa Reverse Transcription Polymerase Chain Reaction kon RT-PCR test.
Gidugang sa mayor nga target sa Regional Task Force-One Caraga Shield nga makabaton niini nga laboratoryo ang rehiyon aron mas paspas na ang pagsuta sa test result sa mga suspected COVID-19 individuals.
Gidugang ni Mayor Lagnada nga ila nang nasubay ang tanang mga Butuanong mitambong sa derby sa Davao City niadtong Marso rason nga sila ug ang ilang pamilya gipa-ilalom na usab sa rapid test samtang napahibalo na usab ang ilang mga hingtungdang barangay officials.
Apan duna matud pa’y posibildad nga duna pa’y wala pa mipatim-aw sa City Health Office nga mao karo’y gipanawagan sa mayor nga mupakita na aron mapugngan ang posibleng pagkaylap sa coronavirus sa ingon dili na makadamay pa sa uban.
Nagpasalamat ang mayor dinhi sa Bombo Radyo Butuan sa paghatag og kahigayunan nga mapa-abot ngadto sa tanan ilabina sa mga Butuan ang tinuod nga sitwasyon sa pagkupot nila sa COVID-19 cases.
Aminado usab siyang nasayod siya nga ang Bombo Radyo Butuan maoy consistent number 1 radio station ning siyudad dayong litok sa na-andan nang extro nga dili mawala kung hisgutan na ang Bombo Radyo.
