BUTUAN CITY – Pabiling wala’y kaso sa COVID-19 ang Caraga Region human migawas sa ikaduhang hugna sa COVID-19 confirmatory lab results gikan sa Southern Philippines Medical Center kon SPMC nga negatibo sa maong sakit ang unom ka mga pasyenteng gi-atiman sa Caraga Regional Hospital sa Surigao City ug laing tulo gikan sa Adela Serra Ty Memorial Medical Center sa may Tandag City sa Surigao del Sur.
Samtang gipa-abot pa nila ang lab results sa laing upat ka mga pasyente.
Makita sa latest data nga sa kinatibuk-ang 36 ka mga PUIs, 12 kanila ang padayong na-admit samtang ang laing 24 anaa sa istriktong home quarantine samtang laing tulo ka mga PUIs usab ang gipagawas na sa ospital human nagnegatibo ang ilang resulta ug mi-maayo ang ilang kondisyon.
Sa pakighinabi sa Bombo Radyo Butuan, aminado si Department of Health-Center for Health and Development kon DOH-CHD Caraga regional director Jose Llacuna Jr. nga dili pa available dinhi sa nasud ang testing technology nga ang resulta mugawas gilayon sunod adlaw.
Kini ang rason nga ang swab test ipadala pa nila ngadto sa Southern Philippine Medical Center sa Davao City diin kini i-analyze.
