BUTUAN CITY – Gikumpirma ni Nasipit, Agusan del Norte Mayor Enrico Corvera nga wala na sila’y gipadunggo pa nga barkong de-pasayruan nga gikan sa kauluhang Manila diha sa ilang pantalan.
Gipadayag kini sa mayor sa eksklusibong pakighinabi sa Bombo Radyo Butuan isip lakang aron dili makasulod sa ilang lungsod ang gikahadlukang COVID-19.
Gibutyag ni Mayor Corvera nga niadto pang Sabado nila kini gipatuman rason nga duna’y mga pasaherong wala gyod makakanaog gikan sa mga barkong gikan pa sa Manila diin natala na ang local transmission sa maong virus.
Gidugang ni Mayor Corvera, nga dili lang ang mga tawong gikan sa Manila ang ilang gidid-an pagsulod sa ilang lungsod kondili apil na kadtong gikan sa uban pang mga lugar sa nasud nga duna na’y natalang local transmission niini.
Kung masuta nilang wala’y simtomas sa COVID-19 ang makasulod sa ilang lungsod nga gikan sa mga lugar nga duna na’y natalang kaso niini, ila mtud pa kining ikonsiderang mga persons under monitoring ug pasayron ang lokal nga kaagamhanan sa lugar nga ilang gigikanan aron ma-monitor ang ilang panglawas.
