BUTUAN CITY – Nag-atubang karon og mga kasong reckless imprudence resulting in multiple homicide ug damage to property ang driver sa Fuso mixer truck human niini gidaro ang motorsiklong gisakyan sa magti-ayong Tindoy uban ang ilang apo didto sa Sison, Surigao del Norte resulta sa ilang kamatayon.
Na-ila ang suspek nga si Robert Salamero, 47-anyos, minyo ug residente sa Morong, Bataan kinsa padulong unta sa Cagayan de Oro City aron i-deliver ang maong sakyanan nga gi-order gikan sa gitrabahuan niining trading corporation.
Sa eksklusibong pakighinabi sa Bombo Radyo Butuan, gibutyag ni PCaptain Giovanni Tindoy – hepe sa kapulisan sa Sison, dihang misiga na ang go sign nga gimontar isip traffic light sa usa ka construction project, daling mitipas sa pikas lane ang mixer truck rason nga nadaro niini ang motorsiklong gisakyan sa mga biktima pasado alas-6:20 ning mi-aging gabii.
Human ang insidenteng natigayon sa national highway, Purok 5 sa maong barangay, dead-on-the-spot ang magti-ayong Vilma ug Manuelito Capilitan, residente sa Purok 6, Brgy. San Pedro sa maong lungsod samtang nadala pa sa ospital ang 5-anyos ilang apong babaye apan namatay usab paglabay sa pipila ka gutlo.
Migawas pa sa ilang imbestigasyon nga naka-inom og ilimnong makahubog ang suspek na akinsa nagtingkagol na karon sa Sison Municipal Police Station.
